АЛМАТЫДА – ЖАҢА ҚОҒАМДЫҚ КЕҢІСТІК
Кез келген қаланың тазалығы ондағы жайқалған жасыл желек пен өзен-көлдердің санына және олардың қалай күтіп-ұсталуына байланысты екені айтпаса да түсінікті. Осы ретте, соңғы кездері көп айтылып жүрген Алматының орталығындағы жаңа скверді абаттандыру мәселесі ақыры өз шешімін тапқанға ұқсайды. Бұл жұмыспен айналысуға ниет танытқан жаңа инвестор табылды. Осы және өзге де жағымды жаңалықтарды жуырда шаһар басшысының өзі жеткізді.
Алматы әкімі Ерболат Досаев мегаполистің Алмалы ауданындағы жаңа скверді абаттандыру жобасын қарап шықты. Қала басшысы жергілікті тұрғындардың өтініші бойынша Райымбек – Сейфуллин – Төреқұлов – Мұратбаев көшелерінің маңындағы қираған нысандардың орнына жаңа қоғамдық кеңістік құруды тапсырды.
«Алтын Сапа ALM» ЖШС инвесторы Сейфуллин даңғылы бойындағы екі ескі тұрғын үйді және бұрынғы ТҚҚ ғимаратын бұзған. Әлеуметтік жауапкершілік аясында инвестор өз есебінен Сейфуллин даңғылы мен Мәметова көшесінің қиылысында ауданы 0,30 га жаңа скверді абаттандырады.
Алмалы ауданының әкімі Арман Шамшин қазіргі уақытта сквер пайда болатын учаскеде қаланың жер қатынастары басқармасы 35 меншік иесінің 16-нан жылжымайтын мүлік сатып алғанын баяндады. Құрылыс жұмыстары жылжымайтын мүлік барлық меншік иелерінен сатып алынғаннан кейін ағымдағы жылдың қазан айына жоспарланған. Баяндаманы тыңдаған қала басшысы белгіленген жоспарға сәйкес жұмысты жалғастыруды тапсырды.
Айта кетерлігі, Алматыда Есентай, Үлкен Алматы өзендерінің бойындағы жағалауларға реконструкция жүргізіледі. Пушкин көшесі бойымен Гоголь көшесінен Райымбек батыр даңғылына дейінгі ұзындығы 1,1 км жаяу жүргіншілер аймағын абаттандыру жоспарлануда.
Тағы бір жақсы жаңалық, Сайран көлі Алматы тұрғындары мен қонақтары үшін тартымды және қауіпсіз орынға айналады. Мегаполис әкімі Ерболат Досаевтың тапсырмасы бойынша мұнда негізгі су айдынының келбеті мен функционалдығын өзгерту бойынша ауқымды жоба қолға алынуда.
Қала басшысы су қоймасының іргелес аумағын реконструкциялау және абаттандыру жұмыстарының барысымен жеке өзі танысты. Ерболат Досаев барлық жұмыстар аяқталғаннан кейін Сайран көлі Алматының полиорталықтарының броне айналатынын, онда қала тұрғындары маусымға қарамастан балалармен бірге уақыт өткізе алатынын атап өтті.
Алматы әкіміне жобаны ландшафт сәулетшісі Нелли Лаптева таныстырды. Оның айтуынша, қазіргі уақытта осы учаскеде қолда бар конструкциялар мен шағын сәулет пішіндерін бөлшектеу аяқталды. Жобаға сәйкес батыс және шығыс кіреберіс топтарының аркаларын жөндеу қарастырылған, онда қоршаулары бар жаяу жүргіншілерге арналған тас жолдар салынады. Солтүстік және оңтүстік жағалауларда тіреу қабырғалары және ұзындығы 250 және 150 метр болатын екі понтондық жаяу жүргіншілер өткелі болады.
Сонымен қатар, жағажай аймақтарына жаңа құм төселеді. Келушілерге ыңғайлы болу үшін іргелес аумақта: орындықтар, урналар, бар үстелдерімен перголалар, фудкорт пайда болады. Белсенді демалыс үшін роллердромы бар скейтпарк, тренажерлар, паркурға арналған орын, велопарк, теннис корттары және балалар қалашығы жасалады.
Аумақты көгалдандыруға ерекше назар аударылады: 4 мыңға жуық ағаш, 7 мың шаршы метр жасыл желектен жасалған қоршау, гүлзарлар, 300 мың шаршы метр түрлі шөптер отырғызу жоспарлануда. Сонымен қатар, Сайранда алғаш рет су өсімдіктері – лотос пайда болады. Абаттандыру жобасында 5 қоғамдық дәретхана мен иттерді серуендетуге арналған қоршалған алаң жасау көзделген. Демалушылардың қауіпсіздігі 2 полиция пункті, 2 құтқару бекетін салу есебінен қамтамасыз етілетін болады. Демалыс аймағының периметрі бойынша бейнебақылау камералары мен дабыл түймелері іске қосылады.
«Біз екі жағалаудан ұзындығы 2,5 шақырым болатын бірыңғай серуендеу жағалауын жасаймыз. 250 және 150 метрлік екі пантонды өткел бар. Жағалау ені 11 метрге ұзарады. Төле би көшесі жағынан біз саябақты шудан, құрап кетуден қорғайтын және оның толық аяқталғанын білдіретін ауқымды жасыл аймақ жасаймыз. Жалпы, біз белсенді демалыс аймағын құратын боламыз. Теннис алаңына және қысқы мұз айдынына арналған желілерді тартатын боламыз» деп атап өтті Нелли Лаптева.
Абаттандыру жобасымен танысқан қала басшысы келушілерге арналған паркингті ойластыруды, жасыл желектерге дұрыс күтім жасауды тапсырды.Аудан тұрғындары Алматы әкімі Ерболат Досаевқа Сайран көлі аумағының ауқымды өзгеретіні үшін алғыстарын білдірді.
«Сайран туралы біздің өтініштерімізге назар аударғаныңыз үшін рахмет. Өте жақсы жоба» деді тұрғындар.
Мегаполис басшысы жалпықалалық жобалардың басты мақсаты – қаланың барлық аудандарындағы алматылықтардың жайлылығы мен қауіпсіздігі екенін атап өтіп, полиорталықтарды дамыту аясында мұндай тартылыс нүктелер қатарының артатынын айтты. Жобаны іске асыру және жағалауды пайдалануға беру көктемгі өсімдік отырғызудан кейін 2025 жылдың мамырына жоспарлануда. Жаңарған жағалау Алмалы және Әуезов аудандары тұрғындары үшін тартымдылық орталығына айналады және бір уақытта мұнда 3 мыңнан астам адам тыныға алады деп болжануда.
Еске салсақ, Алматы әкімінің тапсырмасы бойынша 2022 жылы соңғы 50 жыл ішінде алғаш рет Сайран су қоймасының түбі қоқыс пен лай шөгінділерден механикалық түрде тазартылды, содан кейін абаттандыру жұмыстары басталды. Абаттандырылған аумақтың жалпы ауданы 46,79 га құрайды.
