«Қонаев академиялық қалашығын» салу бойынша меморандумға қол қойылды

Қонаев қаласында Алматы облысының әкімдігі, ҚР Ғылым және жоғарғы білім министрлігі, «Qonayev Academic Campus» Fund» комерциялық емес ұйымы басшылықтарының және БАҚ өкілдерінің қатысуымен «Өзара ынтымақтастық туралы» үшжақты меморандумға қол қою рәсімі өтті, деп хабарлайды Brifing.kz.

Аталған құжатқа облыс әкімі Марат Сұлтанғазиев, министр Саясат Нұрбек және Қор директоры Жанат Рахмани қол қойды.

Бұл уағдаластыққа ҚР Президенті Қасым-Жомарт Тоқаевтың Қонаев қаласында «Қонаев академиялық қалашығын» салу жөніндегі берген тапсырмасын орындау мақсатында қол жеткізіліп отыр.

Келісім шеңберінде Қалашық аумағына 2023-2024 жылдарда толық инфрақұрылым жүргізу, халықаралық ұйымдар мен инвестициялық қорлардан қаржылар тарту арқылы 2024-2027 жылдар аралығында еліміздің төрт университетін көшіру (1-кезеңде) және шетелдік төрт университетті ашу (2-кезеңде), ғылыми-зерттеу орталықтары мен зертханалар, жатақханалар мен қонақ-үйлер салу, жұмыстары атқарылады.

Қалашыққа 100 га жуық жер телімі беріліп, Қонаев қаласының Бас жоспарына енгізілген.