«Үшарал – Достық» жол учаскесінің 90 шақырымы биыл пайдалануға беріледі
Қазіргі уақытта құрылыс жұмыстарының соңғы кезеңі жүріп жатыр, жолдың барлық аумағы бойынша қозғалыс қауіпсіздігі қамтамасыз етілген. Үшарал – Достық бағытындағы республикалық маңызы бар автожолдың 184 шақырымын жаңғырту көзделген. Жобаның құны – 61,2 млрд теңге, деп Brifing.kz хабарлайды ҚР Индустрия және инфрақұрылымдық даму министрлігіне сілтеме жасап.
Алғашқы 87 шақырым бойынша жол қозғалысы 2020-2022 жылдары ашылды. Бүгінде жұмыстар екі учаскеде жүргізіліп жатыр. 90-120 шақырым аралығындағы учаскеде 31 шақырымның 30-ында жабынның төменгі қабатын төсеуге байланысты жұмыстар аяқталып, барлық құбыр орнатылды. Жолшы мамандар жолға мастикалық-қиыршық тасты асфальтбетон төсеп жатыр. Аталған жұмыстар 16 шақырымның 14,2-сінде іске асырылды. Сондай-ақ қардан қорғайтын қоршаулар, баспалдақтар мен тосқауыл қоршауларын орнату қолға алынды. Бұдан бөлек, Ырғайты өзені арқылы өтетін көпірге арқалықтар қойылып жатыр. Бүгінге дейін 50 арқалықтың 46 данасы орнатылды.
Екінші учаскеге келсек, 54,2 шақырымның 49,8 шақырымында жабынның төменгі қабатын орнатуға байланысты жұмыстар аяқталды. Барлық су өткізу құбырлары салынды. 10,73 шақырымның 6,25-іне жабынның жоғарғы қабаты төселді. Сонымен қатар Тоқты көпірінің аралық тіректерін арматура салу арқылы нығайту, Шындалы көпірінің үстіңгі тақтасын құю, бұған қоса су өткізу құбырларын күшейту бойынша жұмыстар іске асырылып жатыр. Темірбетон материалдары 100% дайын.
90-180 шақырым аралығындағы учаскені биыл желтоқсанда пайдалануға беру көзделген.
Бұдан басқа, ҚР Қаржы министрлігінің Мемлекеттік кірістер комитеті мен Ұлттық қауіпсіздік комитетінің Шекара қызметімен бірлесіп, Қазақстан-Қытай шекарасындағы «Достық» өткізу пунктінің құрылысын аяқтау жоспарланған.
