Жансейіт Түймебаев: Еліміз сыртқы саясатта айтарлықтай беделге ие

Биылғы жаңа жылдың басында Egemen Qazaqstan газетіне берген сұхбатында Мемлекет басшысы Қасым-Жомарт Кемелұлы Тоқаев еліміздің ішкі және сыртқы саясатындағы, әлеуметтік-экономикалық дамуындағы реформалардың жаңа мазмұнын ашты.

Президент сұхбатында Жаңа Қазақстан қалыптастырудың жаңа бағыттары мен халықтың әл-ауқатын арттыру және өмір сапасын жақсартудың жаңа қағидалары белгіленді.

Мемлекет басшысы әлемдегі қазіргі геосаяси ахуал жағдайында елімізде ұлттық мүдделерді ескере отырып, сындарлы сыртқы саясат жүргізіліп жатқанын атап өтті.

Ұлт руханиятын көтеруге қатысты жүйелі жұмыстар атқарылатынын да айтты. Осы бағытта биыл Қаныш Сәтбаев, Сағадат Нұрмағамбетов, Рақымжан Қошқарбаев сынды халқымыздың ұлы тұлғаларын дәріптеуге қатысты мерейтойлық іс-шаралар өтеді. Сонымен қатар, мемлекеттілігіміздің ғасырлар бойғы дәстүрлерін паш етіп, айғақтайтын Жошы ұлысының құрылғанына 800 жыл толады. Төл тарихымызды түгендуге келгенде Президент тарихшы ғалымдарымызға үлкен жауапкершілік артуда. Қазақстан тарихын таразылап, кеңінен қамту үшін көптеген тақырыптық әдебиеттер шығарылады, арнайы ғылыми мекемелер құрылады және жұмыс істеп тұрған институттар жаңғыртылады.

Жақында саяси қуғын-сүргін құрбандарын толық ақтау жөніндегі мемлекеттік комиссиясының қорытынды отырысы өтті. ҚазҰУ ғалымдары да мемлекеттік комиссия мүшесі ретінде тарихи құжаттармен жұмыс істеп,  саяси қуғын-сүргін құрбандарына қатысты деректерді анықтауға атсалысты.

Сұхбатта Мемлекет басшысы Қаңтар оқиғасына тоқталып, бұл еліміз үшін үлкен сынақ болғанын атап өтті. Мұндай жағдай жылдар бойы шешімін таппаған әлеуметтік-экономикалық  мәселелердің салдарынан, билік пен халықтың арасының алшақтағанан туындағанын айтты.

Мемлекет тұтастығын сақтап қалуда күшті ерік-жігер танытқан Президент Қасым-Жомарт Тоқаевтың бастамасымен Конституциямызға заман талабына сай өзгертулер мен толықтырулар енгізілді. Бүкілхалықтық референдум арқылы мемлекетіміздің саяси дамуының түбегейлі жаңа бағыты айқындалды. Президент жаңарған Конституциямызды «Жаңа Қазақстанды құру жолындағы маңызды белес» деп атап өтті.

Бүгінде конституциялық реформаларды іске асыру, қоғамды демократияландыру, адам құқықтарын қорғау мәселелеріне ғылыми көзарас қалыптастыру маңызды. Бұл бағытта университетіміздің оқытушы-ғалымдарына, құқықтық білім алып отырған жастарымызға артылар жауапкершілік мол.

Мемлекет басшысы өз сұхбатында Қазақстанның сыртқы елдермен байланыс аясын кеңейту мәселесіне тоқталды. Соңғы жылдары еліміз сыртқы салясатта айтарлықтай беделге ие болып келеді. Бүгінгі таңда ҚазҰУ Ресей Федерациясының жетекші университеттері және институттарымен 150-ден астам келісімге қол қойып, оқытушы, студент алмасып, ортақ ғылыми жобаларды іске асыруда. 2022 жылы ҚазҰУ-да Ресейдің МИФИ ұлттық ядролық зерттеу университетінің филиалы ашылған. Бұл Президен Қасым-Жомарт Тоқаевтың техникалық жоғары оқу орындары филиалдарын құру туралы стратегиялық міндетін орындау аясында жүзеге асырылды. 

Президент Сондай-ақ, Қазақстанның Қытаймен сыртқы саясатында достық, тату көршілік арқылы мәңгілік стратегиялық әріптестіктің жаңа бағытта дамып отырғанын ерекше атап өтті. Мемлекет басшысы Қасым-Жомарт Тоқаевтың 2023 жылдың мамыр айында Қытайға ресми сапары аясында ҚазҰУ-да Солтүстік-Батыс политехникалық университетінің филиалын ашу жөнінде келісімде қол қойылған болатын. Нәтижесінде 2023 жылдың 12 қазанында Қазақстанда тұңғыш рет – ҚазҰУ базасында ҚХР-дағы Солтүстік-Батыс политехникалық университетінің филиалы ашылды.

Өткен жылдың соңында ҚазҰУ-да Қытай университеттерінің көрмесі өтті. Шараны ҚазҰУ мен ҚХР стипендиялық кеңесі және Алматы қаласындағы ҚХР бас консулдығы ұйымдастырды. Көрмеде Қытайдың 45 ең үздік университеті академиялық қызметі туралы ақпарат беріп, білім беру бағдарламаларымен таныстырды. Алдағы уақытта ҚХР Үкіметінің гранты бойынша ҚазҰУ-ға секундына 1800 операцияны жүзеге асыратын Супер компьютерлер жеткізілетін болады.

Мемлекет басшысы сұхбатында  «Біз озық ойлы ұлт ретінде тек қана алға қарауымыз керек» — деген келелі ой айтқан. Бұл тұжырым – әрбір қазақстандық үшін өмірлік ұстаным, бұлжымас қағида болуы керек. Қасым-Жомарт Кемелұлы Тоқаев сұхбатында жалпыұлттық құндылықтарды бірінші орынға қойып, бірлік, ынтымақтастық, еңбекқорлық, білімге ұмтылу, адалдық пен өзара қолдау – ұлтты күшейтіп, жетістікке жетуге мүмкіндік беретінін баса айтты. Президент бастамаларын іске асыруда университет ұжымы ғылыми-білім беру әлеуетін арттыра беретін болады.

Жансейіт ТҮЙМЕБАЕВ,

Әл-Фараби атындағы Қазақ ұлттық университетінің

Басқарма төрағасы – ректоры